「原來搵人陪診都幾難！」

獨居的J突然要做小手術，醫院規定要有人陪同 ── 可是J的家人全部移民，大部分朋友因工作關係，上班時間無法抽身陪診。苦惱之際，他想起已退休數年的舊同事D。

兩人相識三十年，雖然甚少聯絡，但當J鼓起勇氣開口，D卻二話不說答應，而且認真地細問手術詳情、術後治療。手術順利結束後，兩人自然吃飯閒聊近況，相處比想像中更輕鬆自在。

「踏入五十歲，交友標準不再一樣」，J說隨著年齡增長，醫療需求愈來愈多，身邊需要一些可支援醫療需要的朋友：「小時候識朋友講求啱傾，但年過五十，不止需要玩伴，還要能夠陪你面對疾病的朋友。」他歸納出4個重點，有助物色這類朋友：

1️⃣退休舊朋友
「原來識得耐，就算無交集，但只要對方見過你小時候的樣子，就有信任的基礎。」尤其若對方已經退休，時間變得彈性，往往更願意付出時間，甚至會珍惜這些重新連結的機會。

2️⃣善良有擔戴

「同你廿幾歲揀朋友唔同，朋友陪診不需要啱傾啱玩，但要可靠、有基本責任感、善良。」J強調對方要有能力應付突發狀況，例如自己突然暈倒，可送自己回家；若需住院，懂得到家中執拾「走佬袋」、辦理手續：「要有信任，找個可放心交門匙給他、讓他進屋替你收拾衣服的朋友。」

3️⃣不要怕開口

開口求助從來不容易，J坦言，跨越心理障礙、向舊友開口求助是第一步：「幫人容易，我會義不容辭幫助別人，但要叫人幫手總會尷尬。」然而他發現一旦開口，關係就更進一步：「大家從此是共患難的朋友。」

4️⃣從小病小事開始

J建議不必一開始就委以重任，可從陪診、取藥等小事開始：「從小病小事開始麻煩人。」慢慢觀察對方是否可靠，亦避免一次過給過多壓力對方，「萬一唔可靠，都早點知」。

J想起年過八十的父母，近年重遇許多大學同學，正因為大家退休後有時間、有心力重新聯繫。J形容這種關係你來我往、互相支援：「某些舊同學、舊同事就像潛在的新家人，可以我陪你睇病，你陪我覆診。」