陪診〡人手流失 照顧者要睇實

文：梁淑貞

移居加拿大的黃小姐為留港媽媽找陪診服務，已用政府資助服務4年的她認為，香港陪診服務分太多計劃，社署資助服務劃分地區，私人公司收費貴，「一個普通用家，在屋企人突然有需要嘅時候，究竟點樣尋求合適嘅計劃呢？」

黃小姐移居加拿大多年，媽媽及妹妹留港，她2019年向媽媽的長者中心申請津助送飯和陪診，以「普通個案」申請，輪候半年才得到服務，陪診每小時$19，卻曾發生「新手陪診員帶阿媽蕩失路驚險事件」。

她說一般熟手陪診員懂得聯絡老人中心約復康巴士，但新手不懂程序，不懂約車，「試過傍晚5點半離開醫院，搭唔到復康巴士，又唔識去搭的士，行返屋企迷路。」兩人走入將軍澳一條公共屋邨兜路一小時。黃媽媽事後憶述：「佢（陪診員）問我知唔知呢度係邊度？點樣行出去？仲揗雞過我」。黃小姐激氣說，「蕩失路出咗問題都唔係問題，我哋工作總係會有出錯，問題係佢唔識得解決問題，口在路邊都唔識，有手機可以打返中心，甚至打俾我，但係都冇做到」。

黃小姐認為陪診服務需要家人有很清晰的照顧計劃，幫手夾期、夾車、夾人，「有些陪診員好有經驗，可以幫手做晒呢啲安排，但陪診人手流失非常嚴重，新手陪診曾經失約、蕩失路，唔識得做疫情認證，唔識得跟藥、跟約期。」她指近年社福界人手短缺，機構難請陪診員，幾乎每個月轉人，連沒有證書資歷也聘用，由機構老手帶新人，但頻頻轉人令被照顧者難以適應，「機構一般聘用40幾歲新來港人士，鄉音未改，實在好難要求佢識路，同醫院識溝通」。

她續說，「我哋兩姊妹要跟得好貼，媽媽嘅服務先可以做得流暢，但係好多鄰居就會因為陪診係新人，或者送飯時間或內容不符合需要而放棄服務。對海外人士留港嘅父母，即使申請咗服務，由於無安排日程嘅知識同埋能力，往往就咁失去咗服務，變成咗雙老獨留家中，冇人照顧」。

起居照顧員金姐曾在非牟利機構院舍工作10年，推輪椅、扶抱及陪診經驗豐富，後來轉到私營院舍做兼職陪診員，因細心和應變能力好，氹得刁蠻婆婆食飯，家人以高5成薪金聘做私人照顧員，除陪診外，一星期三次陪伴婆婆外出飲茶、購物，甚至陪伴出席飲宴，賓主關係維持3年。

金姐分享道，長者多有慢性疾病，饞嘴的長者覆診時想乘機偷食禁食的食物，要求陪診員「唔好講比屋企人大知，最多請埋你食」，如陪診員心軟，後果嚴重。她建議家人至少和陪診員陪同長者覆診一次，借機考驗陪診員實力，「可以話我唔夠力，你幫我一齊扶婆婆過椅，觀察她是否泊好輪椅、上鎖、降低扶手，讓婆婆輕易移動過椅，如果出死力拉阿婆就唔合格。」

她說，請陪診的僱主多數是專業人士，工作忙碌，家中長者身體差，若缺乏關懷，內心孤獨，脾氣會變得暴躁，經常呼喝人。她建議家人觀察陪診員與長者相處態度，關心長者。